पहिरोले खसेपछि नारायणगढ-मुग्लिन सडकखण्ड अवरुद्ध

२६ असार, चितवन । वर्षासँग झरेको पहिरोले नारायणगढ-मुग्लिन सडकखण्ड अवरुद्ध भएको छ । जिल्ला प्रहरी कार्यालय चितवनका प्रमुख एसपी सुशीलसिंह राठौरका अनुसार मंगलबार बिहान पौने चार बजे घुमाउनेमा ठूलो पहिरो खसेर सडक अवरुद्ध बनेको हो ।

सो स्थानमा पानी परिरहेको कारण अहिले पहिरो पन्छाउने समेत समस्या भएको उनले बताए । ‘पानी केही कम हुनासाथ पहिरो हटाउन थाल्छौं, प्रहरी, उपकरण र आयोजनाका कामदारहरु सो स्थानमा पुगिसकेका छन्,’ एसपी राठौरले भने, ‘पहिरो हटाएर सडक सञ्चालन गर्न ११-१२ बज्छ होला ।’

घुमाउनेको अलवा जलविरे, तोपेखोला लगायतका केही स्थानमा पनि साना-साना पहिरो खसेर सडकमा थुप्रिएको छ । त्यसलाई समेत हटाउने काम भैरहेको एसपी राठौरले जानकारी दिए ।

सडक अवरुद्ध हुँदा रात्रि यात्रामा रहेका यात्रुहरु बीच बाटोमा नै रोकिएका छन् । जतिसक्दो छिटो सडक खुलाएर ति यात्रुहरुलाई पठाउने काम गर्ने एसपी राठौरको भनाइ छ ।

वर्षा लागेसँगै नारायणगढ-मुग्लिन सडकखण्डमा पटकपटक पहिरो गएर सडक बन्द हुँदै आएको छ । जसका कारण यात्रुहरु १० घण्टासम्म जाममा बस्न बाध्य छन् । नारायणगढ-मुग्लिन सडक आयोजनाले अहिले वैकल्पिक सडक प्रयोग गर्न भनेको छ ।

मङ्लबार, असार २६, २०७५ मा प्रकाशित

यसमा तपाइको मत

Loading...

अन्य समाचार